Sojojin runduna ta 2 ta Operation Fansar Yamma sun kama wata mata mai shekaru 25 da ake zargi da safarar alburusai, Shamsiyya Ahadu.
Wata sanarwa da aka fitar a ranar Lahadi, 29 ga Disamba, 2024 tace an kama Matar tare da abokin aikinta, wani mai babur mai suna Ahmed Husaini, a yankin Badarawa na Karamar Hukumar Shinkafi. An same ta da alburusai 764 na 7.62mm da kuma mazagin harsasai guda shida da ake nufin kaiwa sansanin sanannen shugaban ‘yan ta’adda da ake nema, Bello Turji.
“An kama ta ne bayan samun bayanan sirri a kan hanyarta daga Kware zuwa Badarawa a Karamar Hukumar Shinkafi da ke Jihar Zamfara.
“Bisa ga wannan bayani, sojojin Operation Fansan Yamma sun kafa shingen bincike wanda ya kai ga cafke wadanda ake zargin.
“A halin yanzu, ana ci gaba da bincikar wadanda aka kama a hannun hukumomin da suka dace,” in ji sanarwar.
Sanarwar ta kara jaddada kudirin sojojin na kauda duk wata hanyar sadarwa ta ‘yan ta’adda da kuma hana safarar makamai domin aiwatar da munanan ayyukansu.
