Shugaba Tinubu ya isa Lagos don bukukuwan kirsimeti da sabuwar shekara

Shugaban kasa, Bola Ahmed Tinubu, ya isa birnin Lagos domin gudanar da bukukuwan kirsimeti da Sabuwar shekara.

Shugaban ya sauka a sashen musamman na filin jirgin saman Murtala Mohammed da ke Lagos da misalin karfe 3:23 na rana, a ranar Laraba, 18 ga Disamba.

Mai magana da yawun shugaban kasa, Bayo Onanuga, ya tabbatar da hakan a wata sanarwa da ya fitar a ranar Laraba.

Da isarsa Lagos, gwamna Babajide Sanwo-Olu na jihar Lagos tare da mataimakinsa, Dr. Femi Hamzat; mambobin majalisar zartarwa ta jihar Lagos; da shugabanni na jam’iyyar APC mai mulki a Lagos sun tarbi shugaban kasa a filin jirgin saman.

Kafin tafiyarsa daga Abuja, Shugaba Tinubu ya gabatar da kasafin kudin shekarar 2025 ga zaman hadin gwiwa na majalisar dokokin kasa don nazari da amincewa.