Hukumar tsaro ta sibil difens reshen Jihar Kano, karkashin jagorancin Mohammed Lawal Falala, ta sanar da tura jami’ai 3,542 domin tabbatar da tsaro da zaman lafiya yayin bukukuwan Kirsimeti da Sabuwar Shekara a fadin Jihar.
A wata sanarwa da Jami’in Hulda da Jama’a na Hukumar, SC Brahim Idris Abdullahi , ya fitar, an bayyana cewa jami’an da aka tura sun fito ne daga ofisoshi 44 na hukumar a kananan hukumomi, tare da sassa da bangarori daban-daban ciki har da jami’an sirri.
Manufarsu ita ce bayar da cikakken tsaro a wuraren ibada da sauran wurare masu muhimmanci, da jama’a ke taruwa yayin bukukuwan.
Haka kuma, jami’an NSCDC sun hada kai da sauran hukumomin kula da zirga-zirgar ababen hawa domin tabbatar kula da ababen hawa a lokacin bukukuwan.
Hukumar ta kuma jaddada aniyar ci gaba da gudanar da sintirin tsaro a kowane lokaci, tare da kare muhimman gine-gine da ababen more rayuwa a fadin Jihar.
An gargadi masu aikata barna da tada fitina su guji duk wani abu da zai iya kawo tashin hankali, inda aka yi alkawarin daukar matakin doka akan duk wanda aka samu da laifi.
Hukumar NSCDC ta tabbatar wa al’ummar Jihar Kano da shirinta na tabbatar da tsaro da kwanciyar hankali yayin lokacin bukukuwa.
