Peter Obi, ɗan takarar shugaban ƙasa na jam’iyyar Labour Party a zaɓen 2023, ya bayyana bakin cikinsa kan turmutsitsin da yayi sanadiyyar rasuwar mutane yayin rabon tallafin kayan abinci a Oyo, Anambra, da Abuja.
Kusan yara 40 ne suka mutu a wani hatsari yayin wani taron liyafar yara da aka shirya a Ibadan, babban birnin jihar Oyo, a ranar Laraba.
Haka zalika, a ranar Asabar, wani turmutsutsin ya faru yayin rabon tallafi a cocin Holy Trinity Catholic Church da ke unguwar Maitama a Abuja, wanda ya yi sanadiyyar mutuwar mutane 10 tare da jikkatar wasu da dama.
A jihar Anambra, rahotanni sun bayyana cewa mutane kusan 17 sun rasa rayukansu a garin Okija yayin wani hatsari da ya faru a kokarin samun kayan tallafi.
Da yake tsokaci kan lamarin Obi ya bayyana takaicinsa a wata sanarwa da ya fitar ta dandalin sada zumunta na X. Ya ce hatsarurrukan sun nuna gazawar tsarin shugabanci da ke addabar Najeriya.
“Na yi matuƙar bakin ciki da damuwa kan asarar rayuka yayin neman abincin da zasu ci”
Obi ya yaba da ƙoƙarin masu shirya tarukan don tallafa wa talakawa amma ya bayyana cewa rashin ingantaccen tsarin tattalin arziki da shugabancin kasa ya sanya mutane cikin yanayin da ke jefa rayukansu cikin haɗari.
“Ya kamata a tambayi yadda ƙasa mai albarkatu irin Najeriya ta gagara ciyar da al’ummarta, duk da arzikin filayen noma da muke da su,” in ji shi.
Ya kuma mika ta’aziyyarsa ga iyalan waɗanda hatsarurrukan suka shafa. Obi ya ce, “ina mika ta’aziya ta ga iyalan waɗanda suka rasa rayukansu a Oyo, Anambra, da Abuja kuma ina fatan waɗanda suka jikkata su samu sauƙi cikin gaggawa.”
52s104