Gwamnatin jihar Bauchi ta fara raba kayan karatu da na koyarwa, tare da kayan gwaje-gwajen kimiyya zuwa makarantu 223 na sakandare a jihar.
Da take mika kayan a Bauchi ranar Asabar, kwamishinar ilimi, Jamila Dahiru, ta bayyana cewa ma’aikatar ta sayi kayan ne da amincewar Gwamna Bala Mohammed.
Jamila Dahiru, wacce sakataren dindindin na ma’aikatar, Ali Babayo, ya wakilta, ta ce wannan matakin ya nuna shirye-shiryen gwamnati na samar da ingantaccen ilimi da daukaka ilimi zuwa mataki mai girma.
Ta bayyana wasu daga cikin kayan da aka raba sun hada da allo na zamani (whiteboards), alƙaluma, littattafan rubutu, fensir, da sauran kayan karatu da na koyarwa.
Sauran kayan sun hada da panel ɗin hasken rana, batir, kayan kimiyya da na fasaha, da inverters.
Ta ce, “Manufar gwamnati ita ce tabbatar da cewa ana ba da ilimi yadda ya dace da kuma inganci, domin samar da ɗaliban da za su kasance kwararru a harkar karatu da halayya.
“Hakanan, burin gwamnati shi ne ta samar da ɗalibai masu dogaro da kansu, masu samar da ayyukan yi, kuma masu albarka, ta hanyar basirarsu da za su iya tsayawa da kafafunsu.
“Saboda wannan dalili ne aka bai wa ilimin kimiyya da fasaha muhimmanci mai yawa,” in ji ta.
