Gwamna Uba Sani ya shawarci mazauna Jihar Kaduna da su dakile tasirin masu tsattsauran ra’ayi na kabilanci da addini ta hanyar rayuwa cikin zaman lafiya da hadin kai domin samun cigaba mai dorewa.
Gwamnan, wanda ya jaddada cewa ba za a samu ci gaba ba tare da zaman lafiya da jituwa ba, ya nuna farin cikinsa a kan cewa yanzu kowa na zaune cikin ‘yanci ba tare da tsangwama saboda addininsa ko asalinsa a Jihar Kaduna.
Gwamna Uba Sani ya bayyana hakan ne a lokacin kide-kiden Kirsimeti da kungiyar Kiristoci ta Najeriya (CAN) reshen Jihar Kaduna ta shirya a cocin ECWA Good News da ke Narayi Highcost.
Ya koka kan yadda Jihar Kaduna ta sha fama da koma baya sakamakon ayyukan masu tsattsauran ra’ayi na kabilanci da addini, wadanda suka raba jihar bisa ga bambancin kabila da addini saboda son zuciyarsu.
Gwamna Uba Sani ya tunatar da cewa ya yi alkawarin gudanar da mulki cike da adalci da riko da gaskiya wanda zai hada kowa da kowa ba tare da nuna bambanci ba.
A cewarsa, ya halarci kide-kiden Kirsimeti domin taya Kiristoci murna, saboda lokacin da ya hau karagar mulki, ya yi alkawarin yin adalci ga kowa, ba tare da la’akari da bambancin addini, kabila ko ra’ayin siyasa ba.
Ya ce: “Na bayyana a gare ku lokacin da na hau mulki cewa ni gwamna ne na kowa da ke zaune a Kaduna, ko kai Musulmi ne ko Kirista ko daga kowace kabila, zan kasance gwamnan ku.”
Gwamnan ya jaddada cewa babban kalubalen da ke gaban kowa a jihar shi ne taimakawa wajen dawo da martabar Kaduna, yana mai cewa Musulmi da Kiristoci dole ne su zauna tare cikin hadin kai.
Haka kuma, ya nuna bacin ransa kan halin yanzu da ake ciki, inda garin Kaduna ya rabu kashi biyu, Musulmai suna zaune a bangare daya, yayin da Kiristoci ke zaune a dayan bangaren.
Gwamnan ya kara da cewa shugaban kasa Bola Tinubu da shi kansa suna aiki tukuru domin samar da ci gaban tattalin arziki ga kowa, yana mai cewa: “Dole ne mu yi aiki tare, saboda talauci ba shi da kabila, ba shi da addini.”
