Kungiyar bunkasa tattalin arzikin kasashen yammacin Afirka (ECOWAS) ta kaddamar da wata cibiyar dala miliyan 75 don sabunta makamashi da inganta shi da nufin karfafa amfani da makamashi mai tsafta, inganta tsaron abinci, da kuma bunkasa hadin kan yankin a Abuja
Shugaban ECOWAS, Dr. Omar Touray, ya sanar da wannan shiri, yana mai bayyana shi a matsayin wani mataki mai muhimmanci wajen magance matsalolin makamashi da ci gaban tattalin arziki a yankin.
Shirin zai yi amfani da tsarin hada-hadar kudade, wanda ya hada da tallafi da rance.
Dr. Touray ya bayyana cewa cibiyar za ta yi aiki ne ta hanyar dogaro da bukatu wajen neman tsare-tsare daga masana, don tabbatar da samar da makamashi mai tsafta.
Wannan shiri zai taimaka wajen hanzarta aiwatar da ayyukan sabunta makamashi da matakan inganta ingancinsa, wanda zai bunkasa ci gaba mai dorewa da kuma karfafa juriyar tattalin arzikin yankin Yammacin Afirka.
Daya daga cikin manyan abubuwan da cibiyar za ta tallafa wa shi ne samar da kudade don aikin bututun iskar gas mai tsawon kilomita 6,800 daga Najeriya zuwa Morocco.
Wannan aiki zai kasance wata hanya ta jigilar iskar gas mai yawan cubic feet biliyan 30 a kowace shekara.
An tsara bututun a matsayin tubalin ci gaban makamashi na yankin, tare da yiwuwar fadada tasirinsa zuwa kasashen Turai ta hanyar fitar da iskar gas din.
Baya ga magance matsalolin makamashi, cibiyar za ta tallafa wajen inganta tsaron abinci ta hanyar goyon bayan zuba jari a fannin noma. ECOWAS ta tsara ware dala miliyan 15 zuwa miliyan 19 don inganta adana shinkafa, injinan nika, da kuma na’urorin aikin gona.
Wadannan matakai ana sa ran za su kara yawan samar da shinkafa da aka nika zuwa ton miliyan 33, wanda zai kara wadatar abinci a yankin tare da rage dogaro da shigo da kayayyaki daga kasashen waje.
Dr. Touray ya kara da cewa shirin zai taimaka wajen samun fa’idodi masu yawa na hadin kan yankin, ciki har da aiwatar da kudi iri guda, zirga-zirgar jiragen sama, da kuma bunkasa hadin gwiwa wajen sha’anin da albarkatun ruwa.
“Wadannan matakai za su inganta hanyoyin sufuri, rage kudaden gudanarwa, da kuma karfafa hadin kan tattalin arziki tsakanin kasashen ECOWAS,” Inji Dr Touray
