Atiku ya caccaki tsarin karbo rance a kasafin kudin 2025

Tsohon mataimakin shugaban kasa, Atiku Abubakar ya ce kasafin kudin shekarar 2025 da aka gabatar ba zai haɓaka tattalin arziki mai ɗorewa ko kuma shawo kan manyan matsalolin da Najeriya ke fuskanta ba.

A cikin wata sanarwa da ya fitar a ranar Lahadi, Abubakar ya ce kasafin kudin yana nuna yadda ake ci gaba da gudanar da harkar kudade kamar gwamnatocin baya, kuma yana ƙara nauyin bashi na ƙasa.

“Kasafin kudin tarayya na shekarar 2025, wanda ya kai Naira tiriliyan 48 tare da hasashen samun kudin shiga na Naira tiriliyan 35, wanda hakan ya haifar da gibin fiye da Naira tiriliyan 13 ko 4% na GDP,” in ji shi.

“Wannan ya zama al’ada karkashin mulkin jam’iyyar APC tun daga shekarar 2016, inda ake ci gaba da gabatar da kasafin kudin da ke da gibi, tare da dogaro da bashin waje wanda ke ƙaruwa.”

“Domin cike wannan gibi na kudi, gwamnati na shirin karɓo bashin fiye da Naira tiriliyan 13, wanda ya haɗa da Naira tiriliyan 9 a matsayin bashi kai tsaye da kuma Naira tiriliyan 4 don wasu ayyuka na musamman.”

Abubakar ya ce tsarin karɓar bashin ya yi kama da yadda gwamnatocin baya suka yi, inda hakan ke haɓaka nauyin bashi na gwamnati kuma yana ƙara haɗarin da ke tattare da biyan kuɗin ruwa da kuma dogaro da canjin kuɗi na waje.