FRSC ta tura Ma’aikata 1,539 Kano a yayin bukukuwan Kirsimeti

Hukumar Kiyaye Haɗura ta Ƙasa (FRSC) a Jihar Kano ta tura ma’aikata 1,539 domin tabbatar da tsaron hanyoyi da inganta zirga-zirgar ababen hawa a lokacin bukukuwan Kirsimeti da Sabuwar Shekara.

A cikin wata sanarwa da Jami’in Hulɗa da Jama’a na FRSC, Abdullahi Labaran, ya fitar, Kwamandan hukumar a jihar, Umar Matazu, ya bayyana cewa manufar wannan mataki ita ce rage haɗura da kuma kare rayuka da dukiyoyin jama’a a kan hanyoyin jihar a lokacin bukukuwan.

Hukumar ta tura motoci 25 na sintiri, motoci guda biyar na ɗaukar marasa lafiya, babbar motar jan manyan motocin da suka lalace, da sauran kayan aiki, don tabbatar da ingantaccen tsaro a manyan hanyoyi guda shida a jihar.

Kwamanda Matazu ya jaddada muhimmancin bin dokokin hanya, guje wa tuƙin ganganci da wuce gona da iri, da kuma kiyaye lafiyar kowa da kowa. Ya ba da shawarar cewa direbobi su tsara tafiyarsu a kan lokaci, su guji tuƙin dare, sannan su kira lambar gaggawa ta FRSC 122 idan suna da wata matsala, ko kuma su tafi ofishin FRSC mafi kusa don samun taimako.

Matazu ya kuma yi kira ga haɗin gwiwar jama’a da hukumar domin tabbatar da cewa bukukuwan Kirsimeti da Sabuwar Shekara za su tafi lafiya.