Rundunar ‘Yan Sandan Jihar Gombe ta kama wani mai shekaru 27 bisa zargin fyaden wata yarinya mai shekaru 5 a al’ummar Pindiga da ke karamar hukumar Akko a jihar.
Kakakin rundunar, ASP Buhari Abdullahi, ya bayyana hakan a ranar Talata a Gombe yayin da ya gabatar da wanda ake zargi da sauran wadanda aka kama.
Abdullahi yace wanda ake zargin ya jawo yarinyar zuwa falon zama inda ya aikata laifin.
A cewar sa, an kai yarinyar asibiti inda likita ya tabbatar da cewa anyi mata fyade.
Kakakin rundunar ya kara da cewa an kai rahoton lamarin ranar 15 ga watan Disamba karfe 8:30 na safe a ofishin ‘yan sanda na Pindiga.
‘Yan sanda sun bayyana cewa a yayin bincike, wanda ake zargi ya amsa laifin da ake tuhumar shi, kuma za a gurfanar da shi a gaban kotu don shari’a.
