Hukumar Majalisar Dinkin Duniya mai kula da yawan jama’a, UNFPA tare da goyon bayan gwamnatin Norway da haɗin gwiwar Fistula Foundation Nigeria, FFN sun shirya ayyukan tiyata kyauta ga mata 50 da ke fama da cutar yoyon fitsari ta al’aurar (VVF) a Jihar Gombe.
An gudanar da tiyatar ne a Asibitin Kwararru na Gombe, a wani yunkuri na magance illar cutar VVF, wadda ake samun ta sakamakon wata matsala da ke haɗa mafitsara da al’aurar mace, wanda ke jawo fitar fitsari ba kakkautawa.
Dr Sa’ad Idris, babban likitan tiyata, ya bayyana aikin da aka yi a matsayin mai matuƙar nasara kuma ya nuna fata kan samun saukin lafiya ga marasa lafiyan.
Wakilin Daraktan FFN, Ibrahim Abubakar, ya jaddada tasirin canji da wannan shiri ya kawo, yana mai cewa ya ba wa mata da suka dade suna fama da wannan matsalar kwarin gwiwa.
VVF na da alaƙa da haihuwa mai wahala, auren wuri, talauci, da ƙarancin samun sabis na kiwon lafiya, wanda ke haifar da matsalolin lafiya da na zamantakewa ga mata, musamman a arewacin Najeriya.
